Hospital único, ¿si ou non?

Anuncio da Consellería de Sanidade: “Pontevedra contará cun hospital único de referencia da súa área sanitaria e dotado coa tecnoloxía máis avanzada”. Esta nova é recollida desde a páxina web da Xunta de Galicia. Hai poucos días o presidente da Xunta, Alberto Núñez Feijoo, de visita oficial no Concello de Pontevedra, anunciaba a construcción dun novo hospital, cun orzamento de 180 millóns de euros, 60 máis que os previstos polo anterior goberno bipartito (que apostaba pola ampliación de Montecelo). Estes días foron despexando as dúbidas sobre o emprazamento do novo hospital (no monte Carrasco, na parroquia de Marcón), os prazos (calculan que o inicio da licitación e da obra teñan lugar en 2011), e o financiamento (do que non se deron polo momento grandes detalles, tan só referidos á expropiación de terreos -3,1 millóns de euros do Sergas- e 4 millóns de reserva de crédito do Concello de Pontevedra).

Desde a miña humilde opinión non entendo a postura da Xunta. En primeiro lugar, Montecelo xa está dotado cunha infraestructura e instalacións que aínda poden ser  ben explotadas. Pechar Montecelo pra facer un novo hospital carece de sentido e é malgastar os cartos. ¿Para qué se fixeron entón contínuas ampliacións do Hospital no pasado, incluso durante o goberno do PP? Núñez Feijoo falou desde o primeiro momento de contención orzamentaria e austeridade económica do goberno da Xunta. Pero agora quere pechar Montecelo, e gastar 60 millóns máis para facer un novo hospital. ¿É esto o bombón na boca dos Pontevedreses a cambio de estar calados polo superdelegado de Vigo? Pode que tan só sexa para satisfacer o capricho de Telmo Martín (e de paso a ver se sendo alcalde consegue meter a súa construtura para traballar no novo hospital).

¿Alguén sabe o que está facendo o goberno da Xunta? ¿Fai soamente a contra-política do bipartito? Eu non entendo… que mo expliquen, por favor…