Facer deporte en Pontevedra e arredores

Ben, xa hai tempo que non fago deporte. Hai dous anos era un costume, ía todas as semanas á piscina e corría sempre que non chovía. Teño que dicir que daquela vivía en Santiago, e a piscina quedaba ao carón da miña residencia universitaria, e a Alameda estaba a dous minutos a pé.

Despois, desgraciadamente tiven unha operación e non puiden facer deporte por máis de dous meses. Durante ese tempo perdín o costume, e daquela estaba moi atarefado co doctorado, coas clases de alemán, cunha bolsa de colaboración do Colexio Maior, e facendo o CAP. Estaba 24 horas ocupado.

A cuestión é que pasou un ano, e fun a Inglaterra, e despois da rica dieta inglesa basada en chocolatinas e papatiñas e o nulo deporte que fixen, deu coma resultado 10 quilos de máis, e outra vez, unha alerxia ao deporte case enfermiza.

Por iso coa chegada do verán, decidín mercar a miña nova bici e andar un pouco con ela pola cidade e arredores, e ir correr un pouquiño pola cidade.

Hoxe fun correr, e vaia, si que estou de baixa forma. Sei que ao principio desmoraliza moito, que leva moito tempo, que hai que ter forza de vontade e non se lle pode quitar importancia a faltar un día, a dicir que non pasa nada porque hoxe non faga deporte. Pero estou decidido, e agora que por fin teño a metade do día libre, teño tempo dabondo pra facer algo de deporte.

En Pontevedra o único espazo que hai pra practicar deporte, é, obviamente, a beira do río Lérez. Tanto dun lado coma do outro. É certo que os “circuitos” son suficientes en canto ir correr, aínda que non acontece o mesmo se falamos da bici. A cidade é moi incómoda pra ir con ela, tes que meterte entre os coches, e os paseos quédanse pequenos para os percorridos que poden facerse. Saír fóra de Pontevedra non mellora as cousas, xa que noutros concellos, coma Marín ou Poio, non teñen carril-bici e achegarse ás praias convértese nun exercicio de temeridade.

O luns achegueime ata as praias de Marín, e collín a antiga estrada que une as dúas vilas. A estrada é estreitiña, e hai bastante tráfico, non só de coches e autobuses, tamén de camións que entran na factoría ENCE. Ademais hai que soportar o cheiro de Celulosas e da depuradora (que sinceiramente non sei qué é peor). Ao chegar a Marín collo o paseo; sei que teóricamente non podo ir por aí, pero prefiro a multa a chocar cun coche. Despois tan só queda un pequeno tramo ata ás praias, onde xa puxeron (o que me sorprendeu gratamente) un carril-bici dende a estrada nacional baixando ata Portocelo. Pero aí remata, e tes que incorporarte de novo á estrada.

É unha mágoa que os concellos non lle dean un impulso decidido ao uso da bici, e promocione prácticas saludables entre a poboación, coma é o deporte.

¿Sabedes dalgún espazo nos arredores pra poder saír coa bici? Estou seguro que Breogain sabe dalgún. ¿E os demais? ¿Sabedes dalgún?

(A fotografía foi extraída da páxina: www.vitadelia.com)